Celanova. Romaría Raigame en Vilanova dos Infantes

A Romaría Etnográfica Raigame chega a unha nova edición nun ano 2025 no que a Real Academia Galega decidiu dedicarlle o día das Letras Galegas á literatura popular oral transmitida a través das Cantareias, personificadas nas figuras de Adolfina e Rosa Casás Rama, de Cerceda, Eva Castiñeira Santos, de Muxía, e Manuela Lema, Teresa García Prieto e Prudencia e Asunción Garrido Ameixenda, integrantes estas catro das Pandeireteiras de Mens (Malpica), unha representación colectiva, como xa fixera no ano 1998. Coa elección de 2025 quérese recoñecer a importancia da poesía popular oral, que acompaña a nosa sociedade desde sempre, tal como podemos ler na web da RAG. A Romaría Etnográfica Raigame súmase a esta celebración, para o que deseñou unha programación na que as cantareiras e a poesía popoular teñen un papel destacado: actuacións e exhibicións, exposicións, documentais, etc., e que terá como momento álxido a entrega do Premio Adolfo Enríquez ás Cantareiras da nosa provincia, represenadas polas mulleres das aldeas dos concellos de Avión e Beariz. As representacións dos oficios tradicionais terán nesta edición un peso importante coa organización de numerosos obradoiros e demostracións didácticas coa intención de transmitir o seu coñecemento e traballo aos asistentes. Baile, música, artesanía, teatro, gastronomía, exposicións, xogos, espectáculos de rúa, contacontos, e moitas outras actividades nunha xornada lúdico-cultural para celebrar o día das Letras Galegas coa divulgación, transmisión e conservación da nosa lingua como obxectivo primordial.